1Th 3 | BOJ | STEP | Iga Atens qureq di sosimqa iga niŋgi qa are koba qaloqnem. Deqa iga are qalem, iga olo niŋgi qa tariŋqa keresai. Deqa aqo Sailas wo endegsi marem, “Iga Atens qureq endi sqom.”

1 Thessalonians 3

Pol na Timoti a qariŋyonaq Tesalonaika naŋgi qa gilej. Di kiyaqa? A na naŋgo are siŋgilatetnjrqajqa deqa

1 Iga Atens qureq di sosimqa iga niŋgi qa are koba qaloqnem. Deqa iga are qalem, iga olo niŋgi qa tariŋqa keresai. Deqa aqo Sailas wo endegsi marem, “Iga Atens qureq endi sqom.” 2 Marsimqa Timoti qariŋyonam niŋgi qa bej. Timoti a gago Kristen was bole. A Qotei aqa wau tamo. A Kristus aqa anjam bole maro qaji tamo. Iga na a qariŋyonam niŋgi qa bej. A na niŋgi aqaryaiŋgosim nuŋgo areqalo Yesus qa siŋgilateqnub qaji di olo siŋgilatetŋgwajqa deqa marsim a qariŋyonam niŋgi qa bej. 3 Yimqa gulube ti jaqatiŋ ti niŋgi eqnub qaji dena nuŋgo areqalo olo ugetetŋgaim deqa. Niŋgi qalie, Qotei a nami iga gulube deqaji oqajqa marsiq giltgej. 4 Agi iga nuŋgo ambleq di sosimqa endegsi merŋgoqnem, “Gulube gargekoba gagoq boqnqas.” Deqa niŋgi endegsib qalieoiye. Gulube oqajqa bati agi brantqo. 5 Utru deqa e niŋgi qa tariŋqa keresai. Deqa e Timoti qariŋyonam niŋgi qa bej. E endegsi are qalem. Walawalaiyo tamo Satan a na niŋgi uneq waiŋgwoqa niŋgi na gago wau di laŋa ulontosib nuŋgo areqalo Yesus qa siŋgilatqa uratonub kio? E di qalieqajqa deqa Timoti qariŋyonam niŋgi qa bej.

Timoti a olo Pol aqaq bosiqa Tesalonaika naŋgi qa anjam bolequja minjej

6 Ariya Timoti a niŋgi qa bosiqa olo uratŋgsiqa iga qa olo brantosiqa anjam bolequja endegsi mergej, “Tesalonaika Kristen naŋgi Yesus qa naŋgo areqalo siŋgilaboletoqnsib tamo kalil naŋgi tulaŋ qalaqalainjreqnub. Osib gaigai niŋgi qa are qaloqnsib niŋgi qa are boleinjreqnu. Nami niŋgi naŋgi unjrqajqa maroqneb dego kere naŋgi kamba niŋgi dego nuŋgwajqa mareqnub.” 7 O was qu, niŋgi Yesus qa degsib nuŋgo areqalo siŋgilaboleteqnub anjam di Timoti a bosiq mergonaqa iga qusim dena gago gulube kalil qa gago are siŋgilatetgej. 8 Iga qalieonum, niŋgi Tamo Koba Yesus aqa ñam siŋgila na ojejunub. Iga di qalieosim deqa bini iga so bole unum. 9 Iga niŋgi qa are qaloqnsim deqa gago Qotei aqa ŋamgalaq di iga tulaŋ areboleboleigeqnu. Iga endegsi are qalonum. Gago arebolebole di tulaŋ kobaquja. Gago arebolebole di Qotei na egej deqa iga a tulaŋ biŋiyeqnum. 10 Iga qanam ti qolo ti endegsi Qotei pailyeqnum, “O Abu, ni na iga odgimqa iga Tesalonaika Kristen naŋgi qa gilsim unjrqom. Unjrsim naŋgo areqalo Yesus qa siŋgilateqnub qaji di truquinjrimqa iga na olo siŋgilatetnjrqom.” Iga degsim Qotei pailyeqnum.

Pol a olo Tesalonaika naŋgi qa gilqajqa deqa Qotei pailyeqnu

11 Gago areqalo agiende. Gago Abu Qotei wo gago Tamo Koba Yesus wo naŋgi aiyel na gam gereiyetgibqa iga niŋgi qa bqom. 12 Gago areqalo bei dego agiende. Tamo Koba Qotei a na niŋgi siŋgilatŋgimqa qalaqalaiyo kumbra nuŋgoq di tulaŋ kobaamqa niŋgi na Qotei aqa segi tamo uŋgasari naŋgi ti tamo kalil naŋgi ti tulaŋ qalaqalainjroqnqab. Agi iga na niŋgi tulaŋ qalaqalaiŋgeqnum dego kere. 13 Yimqa kumbra dena Qotei a nuŋgo are miligi siŋgilatetŋgimqa mondoŋ gago Tamo Koba Yesus a na Qotei aqa segi tamo uŋgasari kalil naŋgi laŋ qureq dena joqsim bosimqa niŋgi Qotei aqa segi kumbra bole dauryeqnub di a bosim unqas. Bati deqa niŋgi tamo uŋgasari tulaŋ boledamu tiŋtiŋ sosib gago Abu Qotei aqa ŋamgalaq di une saiqoji sqab. Bole.